உங்கள் வீட்டிலேயே ஒரு பியூட்டி பார்லர்

உங்கள் வீட்டிலேயே ஒரு பியூட்டி பார்லர்

‘குங்குமம் தோழி’ இதழில் வெளியானபோது பல லட்சக்கணக்கான பெண்களை அழகிகளாக மாற்றிய அழகு ரகசியங்கள் இந்தப் புத்தகமாக மலர்ந்துள்ளது! பெண்களுக்கு தன் அழகு மீது கர்வம் மட்டுமல்ல... கவனமும் அதிகம்.  இயல்பாகவே அழகாக இருக்கும் பெண்கள் கூட, தங்களை மேலும் அழகுபடுத்திக் கொள்வதில் ஆர்வம் காட்டவே செய்கின்றனர். அழகானவர்களே இப்படி என்றால், ‘நாம் அழகி இல்லை’, ‘நாம் சுமாரானவள்’ என்று தங்களைப் பற்றிக் குறைத்து மதிப்பிட்டுக் கொள்கிற பெண்களுக்கு, தங்களை அழகுபடுத்திக் கொள்வதில் எத்தனை ஆர்வம் இருக்கும் என்று சொல்ல வேண்டியதில்லை. கடந்த தலைமுறைப் பெண்களுக்கு தங்களை கூடுதல் அழகாக்கிக் கொள்ளும் வாய்ப்புகள் குறைவாகவே இருந்தன.

அதிகபட்சமாக, முகத்தில் மஞ்சளை பூசிக் கொள்வதோடு அவர்களின் ‘அழகாகும் ஆசை’ அரைகுறையாக முடிந்து போனது. இன்றைய பெண்களுக்கு அப்படிப்பட்ட துயரம் இல்லை. சாதாரண பெட்டிக்கடைகளில் கூட அழகுசாதனப்பொருட்கள் எளிதில் கிடைக்கின்றன. அப்பொருட்களில் திருப்தியடையாதவர்களுக்கு இருக்கவே இருக்கின்றன... பியூட்டி பார்லர் என்கிற அழகு நிலையங்கள்! ஒருகாலத்தில் வசதிபடைத்த சீமாட்டிகள் மட்டுமே செல்லக்கூடிய இடமாக இருந்தன பியூட்டி பார்லர்கள். இன்றைக்கு? பெரு நகரங்களில் மட்டுமல்ல, சிறு நகரங்களிலும் இப்போது எங்கு திரும்பினும் அழகு நிலையங்கள். ஆனாலும், நடுத்தர வர்க்கப் பெண்கள் அழகு நிலையங்களுக்குள் அத்தனை சுலபமாக பிரவேசித்துவிடுவதில்லை என்பதையும் மறுப்பதற்கில்லை. அப்படியானதொரு சூழலில், வீட்டிலேயே ஒரு பியூட்டி பார்லரை நிறுவி, உங்களையும் குடும்பத்தினரையும் அழகுபடுத்திக்கொள்ள வழிகாட்டுகிறது இந்நூல். அழகுக்கு அழகு சேர்க்க வாழ்த்துகள்!.